بصمات

سبع سنين يابني ما اعرف .. ياترى عيان
عريان .. جعان .. ولا ميت ولا لسه حي
سبع سنين يابني في الغربة وأنا إنسـان
مش أعمى .. لكن بفتش في النهار ع الضي

***
تسرق شلن تبقى هيصه وبلوه وجريمة
تسرق ألوف الألوف تبقى م الأبطال
وكل ما السرقة تكبر.. القانون سيمه
وكل ما السرقة تصغر.. فيه حرام وحلال

***

آه يابنى يا ورده لسـه منوره ع الغصن
إوعى الخيانة يا كبدي إوعى م الاندال
الفن أصبح خيانة والخيانة فن
شوف الشوارع وقوللى فيها كام تمثال

***
قالولي بيعه .. قالولي يابني " بيع ابنك "
وجوَّعوني يا شهدي في بلاد بره
قالولي "ها تموت" وقلت أموت عشان خطرك
وموتونى وأنا عايش متين مره