سطر.. سطر.. سطر .. سطر

هذا النص: ساحر فاخر آسر، وهو في الأدب "أدب مستقل"، وفي الشعر معجزة تبث من الورق عطرا، وعبد الله مدعج، لا يحضر سوى محملٍ بغمام ثقيل ترقص بداخله حبات مطر، وتصبح الأوراق الأرض المنتظرة، نركض بين حقول الكلام، ونصنع من أفكاره سور دفء.
هذا النص قد يكون أقصى ما يتمناه عقل، وأجمل ما يشتاق إليه قلب، ولعبد الله الشكر لأنه أهدانا من داخله أنفاس تشكلت كالصباح، والحرف: عصفور يغنينا معه.

الليله هذي مُعشبه
ليله من غيوم ومطر
لها أعذب اللي أكتبه
سطر.. سطر.. سطر.. سطر
مالهاش وصف ولا شبه
ومالا على بال يخطر
صوره مهي مترتبه
بلا براويز وأُطر !!
***
الليله هذي من خضار
من ماء ورد ومن عسل
فيها حياتي واحتضار
حزني ودمعي والكسل
***
الليله هذي دوزنه
طرب.. عصافير وحمام
لها قصيـدي باوزنه
ولها تحيات وسلام
***
الليله هذي من سهر
ليله من أشعار وغُنا
من نجمتين ومن نهر
من رقص وافراح وهَنا
***
الليله هذي مهلكه
بيضاء واعمق من سواد
ما فيه درب تسلكه
للصبح ولاّ للبعاد
***
الليله هذي من عجب
كأنها صباح عيد
فيها من المغرب صخب
ومن العصر جلسة وحيد
***
الليله من طفله ضحكت
من طفل عصر الأربعا
من عاشقه لعاشق حكت
من حمد وسجاده ودعا
***
الليله هـــذي من بَحَر
ليله من رعود وبروق
لا والله ليله من سَحَر
من وقت ما قبل الشروق
كأنها عقد فــ نحََر
أو عشق يجري في عروق
***
الليله هذي من فضا
من غصن أخضر من طيور
لون القمر.. لون الغضا
وريح النسايم من زهور
الشوق: ثلج ومن: لظا
وظلامها ملياااان نور!
***
الليله هذي من خيال
انا وهي... وهي وانا
قدامي وخلفي/ ظلال
واحسها معي هنا!
ليله من احلام ومُحال
نستني ليال العنا!!
***
وقبل وداعي والسلام
سؤال حاير فاضلعي
قيسوا على هذا الكلام
وشلون لو كانت معي؟