منديل هنَّومة.. ومطالب للحكومة!
"سيد الموجي".. من الواضح أنه من أبناء النيل، الذين تلاقحت ذوائقهم بثورية أحمد فؤاد نجم والشيخ إمام وعبد الرحمن الأبنودي.. هو يطلب في قصيدته وضع مزاد لمنديل الفتاة الريفية البسيطة "هنومة" كالمزاد الذي تم وضعه لمنديل "أم كلثوم" وبيع فيه بملايين الجنيهات، خصوصا وأنه "المنديل" بالنسبة لـ "هنومة" أغلى بكثير من أهميته لدى "ثومة"!
"سيد الموجي" حالة ليست بالجديدة شعريا، ولكنه استمرار لمسيرة شعرية مصرية تجعل من "الخبز" و"الفول" و"الرصيف" زهورا تُشم، وأغانٍ تُسمع، ولوحات تُشاهد!
ملايين خمسة ونص دولار
اتباع بيها منديل ثومة
دا كلام بتذيعو الأخبار
لا هزار ولا أفكار مسمومة
ولا فيه رفض ولا استنكار
ولا تعبير عن أي خصومة
ولا فيه تقليل من مقدار
فنانة مصر المرحومة
ثومة هرم رابع ومنار
ثومة قضية خلاص محسومة
بس اللافت للأنظار
هو وجود مناديل مظلومة
مثلا منديل ست الدار
وبهانة وفلة وفطومة
والشقيانة ليل ونهار
بياعة الجرجير هنومة
منديلها المتعاص بعفار
وعرق ودموع مش مفهومة
منديل ييجي تلات امتار
ومفيش فيه رقة ولا نعومة
كان بيلم غدا الأنفار
ويشيل رز يكفي عزومة
ويحوش عنها صهد النار
ويدفيها وقت النومة
منديل له لون الصبار
وبراح الآاااه المكتومة
وياعيني طاويه الاستهتار
وضاربها الفقر بميت شومة
وعشان نختصر المشوار
ونجيب م الآخر يا حكومة
مش طالب غير بس قرار
بمزاد على منديل هنومة !!
الشاعر المصري: سيد الموجي