بالهنا والقافية
استهلال
شايب حداثي
وبما أن صديقنا وزميلنا فيصل الخالد يتمتع بإجازة صيتية (صيفية شتوية) في ربوع إسبانيا، لذلك استدعوني الشباب على جناح السرعة لتغطية "الخانة"، وبما إنو فيصل الخالد اللي يدلعه ياسر الكنعان ويسميه "فصولي" قررت أدلعه أنا برضو وأخصص له مساحة الزاوية كلها، يبون يبون، ما يبون عمرهم ما بغو، وخل يجيبون "فصولي" من إسبانيا يغطي لهم مساحاته، وبما إني "خبرة" وموب زي "فصولي" لقيت لكم نص يحبه قلبكم ل "فصولي" يبرد قلب الإخوة والأخوات اللي مستلمهم في الزاوية من كم شهر!
حيا الله الملزوم
وأنا جيتك ولا عندي سوى مايلزم الملزوم
لأني مؤمن بشي ٍ يقوله شيخ بالسودان
صديغك زاته من صدغك اقيف لحشمة المحشوم
حبيب ألبي العمر كلوّه على قولة اهل لبنان
فيصل الخالد
يلزم الملزوم.. حشمة المحشوم.. ذكرتني بأخوانا أهل الأردن لما يقولون اقعد قاعد واسكت ساكت، يعني من جد البيت الأول أكبر دليل على مقولة فسر الماء بعد الجهد بالماء، هو ملزوم وش يلزمه أكثر من الالزام اللي هو اتلزمه بس تتوقع انه مزكوم والا بس ملزوم، بعدين يابو الشباب سالفة انك تجيب بيت بلهجة ما هي لهجتك هذه يبي لها إعادة نظر نوعا ما، لأن بصراحة ومن غير أي زعل يابو خالد السوداني راكب عليك، أما اللبناني ابد ماهو لايق لك، في المرة القادمة الله لا يهينك ركز خلك في حدود إفريقيا ابرك لك اتفقنا يا متفوق؟!
جرجتوبي وجرجرتوبو!
قلت ابفهم ويش ذنبي ليه جرجرتوبي ؟
كلها الدعوه خيال وفكرة ٍ ورديه
قالوا حتى في خيالك لا تقرب روبي
ما لك الا كبسة امك واترك الطعميه
برضك فيصل الخالد
جرجرتوبي هذه يبي لها وقفة وتأمل.. لأني الصراحة يابو خالد لو أنهم جايينك بونش أو تريلا ما قدروا يجرجرون فيك، صعبة جدا ولا تدخل العقل، معليش خلينا نكون واقعيين يا بو خالد، بعدين أحلام وردية مع روبي، أحلام وردية على أي أساس؟ قول أحلام إندونيسية قول أحلام سنغالية، يعني يوم انك نويت تتهور وتكتب عن مطربة ما لقيت الا هالقشع الله يصلحك، طبعا أنا شخصيا والعياذ بالله من كلمة أنا لي تحفظ بسيط جدا على "مالك الا كبسة أمك" أصلا وش دمرك انت واخوك الا الكبسة؟ لا بالله اللي انصحك هالنصيحه ما يحبك!
أبو دقة.. أبو رشرش
تعبت بعشقي لسارة ونوف ومي مع شمه
فقارا ما لقيت الا بو دقه .. دق جوالي
تبون الجد .. انا امزح.. قصيدي مستخف دمه
ولو بنت الفقر فالي ... ف (فال الله) ولا فالي
وحنا وش ورانا؟.. أيضا فيصل الخالد
يا سلام يا سلام يتهيأ لي قبل كمن زاوية قريت لك تعليق مجرم على شاعر وكنت حضرتك شبه ماكله بقشوره بس لأنه قال ماسك زقارة، وطلعت لنا فيها مبادئ وقلبتها محاضرة علم اجتماع، ولابد للشاعر أن يعكس أخلاق ومبادئ إسلامية لدرجة إني صدقتك يا رجل، بس انت عادي طبعا انك تطيح بشلة أبو دقة؟ لا وليت طايح على شي عدل "أبو دقة" ما لك الا بنت الفقر واقعد بها انت وفالك!
محبوبو ساكن فيه!
ماظن غيري ساكنه محبوبه
يدخل بصدري لي لقطت انفاسي
يكفيه روحي جبتها مصبوبه
مديت كفي ولا تقـّبل كاسي
الليلة ليلتك يا.. فيصل الخالد
الأخ شايف نفسه شقق مفروشة؟ طيب محبوبك ساكنك على شارعين ولا شارع... طيب فيه بلكونة؟ أهم شي تكون خدودك تشطيب ديلوكس فديت هالخديدات، تكفى ترى مو أي شي يناسب محبوبك، اللهم سكنهم بمساكنهم يا رب، ماحد قال لك تحب جنيه وتخليها تتلبسك، بعدين يا بو الشباب اسمها مديت يمناي مديت يدي أما مديت كفي هذي جديدة مرتا بالحيل يا شيخ عدنان، أنتم في إسبانيا تقهوون باليمين ولا بالكفوف؟ الله يكفينا شر قهوتك بس اتخيلك حاط الفنجال على كفك وكفك يحرررررررررقك وانت تقول له: سم يالمحبوب، وفوق هذا ما تقبل كاسك وش هالجنية المجرمة اللي أنت متولع فيها!