بالهنا والقافية

استهلال
هاتفني الشاعر الكبير والإعلامي المخضرم "لاعب كوره على غفلة" ريفيلينو أقصد فهد عافت وهذا كان بمثابة أول اتصال هاتفي بيننا :"هلا فيصل كيفك معاك فهد عافت" طبعاً ماني قايل لكم جزئيتي من المكالمة لأنه الظاهر أغمى علي من الفرحة.. بعد تبادل السلامات قال لي فهد "فيصل أنا من أشد المعجبين بقلمك وأسلوبك تذكرني بنفسي أيام المشاكسات وعلى فكره تراني معجب أيضاً بقصائدك الرائعة وبدا يسمعني بعض من أبياتي طبعاً أنا من الفرحة ما أدري وش أقول.. توني باقوله فهد أنا، إلا المنبه يخرش وقوم يا فيصل جاء وقت الدوام، اتصالك يا فهد لو كان حلم فهو شرف... وأنا لو منك استحي مني وأدق علي بس قبل لا تدق أحفظ لك كمن بيت لي عشان ما تنحرج وتحرجنا معاك... فهد أنا حطيت هالمقدمة عشان أساعدك وتصير مشهور من خلال زوايتي بما إن الخمسين سنة جهد وتعب وشهرة إعلامية وأمسيات ونجاح تلو الآخر ما شهرتك بالهنا والقافية هل ياللي بتشهرك.

افااااااااااااااعبدالله يتتن
خلصت لي باكيت وفكيت باكيت
وأحرقت قلبي قبل أشب السجارة
عبدالله فلاح الهاجري
عبدالله فلاح الهاجري اتق الله في نفسك وتراك محاسب على صحتك ومالك وأنت تعرف أن التدخين مضر بالصحة وقلنا لك هالكلام كذا مرة بس الله يهديك منت راضي تسمع وبعدين يابو فلاح أنت وزنك كله على بعضه ما يطلع أربعة كيلو تدخن ليه ؟ وش ناوي تحرق ووش يبقى منك ؟ طبعا ما راح أسالك يابو فلا ح ليه كاتب هالبيت لأني فاهم قصدك.. أنت تبي توضح لزملائك الشعراء من خلال كتابتك للبيت هذا إن الشاعر لابد إن يكون قدوة لمعجبيه وأن يعكس السلوك السليم... بارك الله فيك يابو فلاح ومن زمااااااااان ما شفناك بالكوفي شوب اللي أنت خابر حاط يدك على خدك وتفكر... رواد هذاك المقهى كلهم يعرفونك ويعرفون أنك تدخن والحين الساحة كلها تعرف يا راعي التتن استغفر الله العظيم.

العومسة والنومسة
بعض البشر يجبرك غصب ٍ تعومس
بأفعالة الشينة وبأسلوبه الفظ
من جد هذا صحبته ما تنومس
غسل يدينك عنه وإلا بعد وض
فريح العقيلي

معاني المفردات : عومس من عومسة والعومسة هي لا تقرب للعولمة إطلاقا فهي عبارة عن تصفيط الوجه إلى سبع صفطات واكن الوجه يقول يا شين طس شوفتك تصفط الوجه، أما النومسة رغم قربها من العومسة إلا أنها تختلف في معناها اختلافا كليا فهي الوناسة وفي معنى آخر الفلة، فريح إحنا عارفين أنك دارس لغات وراجع من بره نشيط ما شاء الله عليك بس يكفي استعراض وارفق علينا شوي ياخي ومن اليوم ورايح لا تكتب شي إلا وأنت مذيله بملحوظة: إذا تورطت اقرأ المورد أو دق علي، القراء لهم عليك حق يا بتاع اللغات بعدين وضضضضضضضضضضضضضضضضض هذه جديدة فيه توض بكيفك تحذف حروف أنت تحسبها فوضى.

ربع تيس مندي
في الزمن أشياء تعني لي الكثير
التمام الشمل حول المايدة
ثامر شبيب الدقباسي

تحس أنك يا ثامر تركيزك واهتمامك ينصب على المندي، يعني المائدة تعني لك كثير مع أنه مو بين على جسمك أبد ولا بد أن تفيد الساحة وتقول لنا أي أنواع الرياضة تمارس؟ طيب هل الطلب لازم يكون مندي لحم وإلا مندي دجاج يمشي الحال؟ أي شمل اللي معه سلطة حار وسلطة بارد وضرب خمس، أكيد القعدة بتكون جدا رومانسية، طيب وين هموم الشعب ؟ وين هموم الأمة؟ وين أسعار البي إم دبليو مقارنة باليورو اللي ما هو معطي أحد مجال يتنفس؟ المايده أهم من كل هذا؟ مع أني لما أشوف جسمك يا ثامر أقول شكلك نص سندويشة عشاء والباقي تكمله فطور وإن حضر بعد.

ومواهبٌ أخرى
إن شعرت الوقت ملني وإلا مرتني الكآبة
أخذ الجيتار وأعزف أحلى لحن لكورتزار
بشاير الشيباني
إذا مرتك الكآبة تمرك على سيكل وإلا دباب؟ عاد تصدقين يا بشاير إني قايلهم بجانب موهبة الأناقة المسرحية اللي عندك في مواهب أخرى ما أحد يعرفها غير 200 ألف شخص فقط بس ما أحد مصدقني، أثريك ما شاء الله عازفة جيتار؟ لا ومو أي عزف تجيدين لحن كورتزار وهذا مو أي أحد يجيده، يعني عبادي الجوهر وأيام عزه ما يجيبه وحده لحن الكورتزون، بشاير بجانب موهبة قراءة الشعر ودلع الإلقاء وأناقة المسرح ورزرزة الساعات والخواتم الألماس وعزف الجيتار وإيجادة ألحان كورتزار هل فيه مواهب أخرى ما نعرفها؟ يعني بتصدمينا بكرة وتقولين أسوق سيكل صتي وألمع كفراته وعندي شمليذر وإلا لا؟ خلينا على بينة من الحين.