بالهنا والقافية

استهلال
"شاعر القلطة الشاب سلطان الجلاوي تعرض لمحاولة اعتداء بالضرب من قبل مجموعة كبيرة من الجماهير أثناء محاورته الأخيرة" هذا الخبر اللي قريته، أنا عندي استفسار بسيط عنه: موضة الضرب هذي شاملة شعراء القلطة فقط، وإلا قد تشمل جميع الشعراء؟ الواحد وده يتطمن على مستقبله.. بعدين أنا قد سمعت إن الجمهور يعطي وردة، يطلب توقيع، يشره، يهدي هدية، يطق هذي جديدة والله يكفينا شر المستخبي، عموما إذا فيه لي جمهور عنده هذا النوع من الإعجاب فأنا ومن هذا المنبر الحر أعترف أن اللي يكتب الزاوية هذي ليس فيصل الخالد، إنما هو ياسر الكنعان ويستحق كل الإعجاب.. حيلكم فيه!!

شنب الراسية

واهجريني يضرب الحب والجرح العميق
هجرة اللي ما وفا لي ولا طال شنبي
اقسمـي باللـي خلقنـي وبالبيـت العتيـق
والا فريها على "مصـر" وحيـاة النبـي
الراسية

معقولة؟ معقولة؟ الراسية لها شنب يا قدعان! الراسية لها شنب! الراسية طلعت شنب معقولة! دوخت نص الساحة وآخرتها شنب! لا ولايق لك يا بو الشباب اللهجة اللبنانية جدا "يضرب الحب" بس كان ناقص تقول "شو بيزل"، الراسية طيب شنبك مخففته وإلا مجففته والا ستيناتي والا وش وضعه؟ طيب اسمع يا بو شنب وش رايك تعترف وتخلصنا، وعلى فكرة ترى الحلف ما يجوز إلا بالله سبحانه وتعالي، يعني ما يجوز نقول وحياة النبي للمعلومية فقط يا أبو شنب!

اعترف البطل

ولدت ساطي ومتغرطس واحب الخصام
ولا اعترف في إدارة طبع ولا مدير
ياسر التويجري

أشوى إني ما قلت شي، أنت اللي اعترفت وقلت بنفسك وعلى فكرة ترى من زمان الكل وده يقول لك ومستحي منك، اللي ما كنا نعرفه أنها مشكلة منذ الولادة، والله إني أحسبها مشكلة واجهتها على كبر بس يلله على الأقل إذا عرف الإنسان المشكلة واعترف بها يعتبر وجد نص الحل، الله يساعدك وتكمل النص الباقي يا ياسر وعلى فكره تراك محلو يا وحش بعد تضبيط الأسنان والحركات من قدك يا عم.

جاباني ووداني

ياخي لي أسبـوع وأخلاقي تجاريـة
ميد إن تشينا ماهي ميـد إن جابانـي
سلطان بن بتلاء

ميد إن وين؟ ميد إن وين؟ معليه قولها ثاني كده ميد إن وين؟ تشينا! يا رجل استغرقتني ربع ساعة قراءة وفك خط يا الله بالله فهمت أنك تبي تقول الصين، لا واضح أن مو بس أخلاقك اللي تجارية حتى جغرافيتك بعد تجارية يا سلطان، طيب أحلف لك بإيش يا أخ سلطان إنها بالياء مو الجيم؟ طبعا أنت عارف وش أنا أتكلم عنه، أيووووووووووووه عليك نور هي اليابان اللي احنا بنقصدها، يعني ما فيه شي اسمه شينا وجاباني فيه ياباني ينفع؟

برايات وأقلام رصاص

يا بري حالي عليها بري حالي
عليها يابري حالي عشر بريات
سعد علوش

بري حالي بري حالي بري حالي بري حالي، علق الشريط يا أبو علوش على "بري حالي"؟ طيب طفي وشغل يمكن الله يكتب ويمشي الحال، سوي "ريستارت" طيب، عاد تصدق لو أنك قلت "عشر برايات" بدال "عشر بريات" كان خذت لك دفتر أبو 60 مسطر ببلاش وبراية خضراء من اللي فيها مراية في الظهر من مكتبة جرير، وخصوصا الحين ركود الاختبارات وخلصت يعني البرايات مالها زباين أبد.