بالهنا والقافية
استهلال
"أصدرت جمعية الشعر الشعبي في مملكة البحرين قرارا ينص على فصل الشاعرين فيصل المريسي ومحمد الصيادي وتوجيه إنذار بالفصل لسبعة أعضاء آخرين"، قال صفوا صفين قالوا حنا اثنين، جمعية الشعر البحريني إذا عصّبت تفصل في الشعراء طيب مين بيبقى؟ طيب لو فيصل المريسي جاب ولي أمره وحل واجباته من اليوم ورايح وبطل شخبطة على الجدران يُلغى قرار فصله كشاعر؟ بصراحة خطوة غير مسبوقة لجمعية الشعر الشعبي في البحرين، فصل وخصم رواتب وإنهاء عقد وتسفير شعراء، يعني شغل شركات مية مية، فيصل نصيحة أخ، قدم على جمعية الشعر الشعبي في الخرطوم يمكن عندهم وظائف شاغرة!
تفتيششششششش
لو تسوّي ما تسوّي تراني قويْ الباس
وحتيّش لو تلبس بناطيل ماجيلك
ترى مايجيب الراس إلاّ عباة الراس
ابنصحك يالغالي توفّر بناطيلك !
تركي الديحاني
تركي وش فيك حيران بعمرك انت؟ طيب إيش صلة القرابة بين "حتيش" و"تفتيش"؟ تصدق أنا مرة واقف عند "حتيش" وما كان معاي الرخصة والاستمارة، وقالوا لي "الحتيش" لازم تسوق برخصة واستمارة والا ترى بنحتشك! تعرف طبعا فعل "الحتشته" وبعدين يا دكتور ترى هي "بنطال" بالفصحى وبالمحكي "بنطلون"، بكيفك هي تقلب فصحى ومحكي ومحكي وفصحى، أدوختنا يا هو ركز في شغلك، لا نسوي لك "حتيش" ونصيد عندك المستخبي!
الباشا عنده قرحة
محبتك وشعورك تجيني لكن تقطير
وانا الحب بالتقطيـر سبب لي القرحة
علي بن حمري
تقطير اممممممم تقطير! الأخ عاشق له "ماسورة"، طيب اسمع غير لها "جلدة" وجب لك سباك يضبط أمورها، وانصحك ونفسي والمسلمين بتركيب قطع غيار أصلية لتفادي القرحة، وان جيت للحق والله ما سبب لنا القرحة إلا سباكين الساحة الشعبية.
"خطاك السو" حبيبي وأجر وعافية، خوفي يصير المعشوق القادم "قولون" و"نقرس" يصير مو ناقصك الا طاقية "أم جنيه"، وتصير كامل والكامل وجهه سبحانه!
مين فينا الحرامي؟
ليه مدري؟! بس لله في خلقه شؤون
انت في كون لحالك وخلق الله بكـون
والا فإنا لله وإنـا إليـه راجعـون
سعد بن جدلان
سبحانك يا ربي على توارد الخواطر بينك يا ابن جدلان وبين حامد زيد، نفس الاشطر هذه تكررت في قصيدة الشعراء لحامد زيد، لا وميزة هذا التوارد إنها تواردت حرفيا، أكيد خواطرك كانت سهرانة عند خواطره واتفقوا بعد العشاء أن يتواردوا! مع إني منبه حامد زيد ينتبه لخواطره لا تطلع الشارع، أخاف عليها من السيارات، طيب إذا أنتم يا كبار الساحة تسوون كذا وش خليتوا لمحمد معرفي؟
احذروا الدنافيس!
وان زاد جمع الدنفسـة بالدنافيـس
يبطـون والله بالغـدر ماغـدوبـي
ضيدان بن قضعان
الله يا ضيدان الله على كلام المعلمين، كلام ما يقوله إلا شاعر قرر يثبت للكل إنه يتكلم لغات "دنفسة" و"دنافيس".. ده إنقليزي ده يا مرسي؟ أنا اللي كنت اعرفه عنك أنك تؤلف تركيبات لغوية عربية جديدة مثل الشطر الشهير حقك "آه يا بشويش يا هد الإضاءة"، وانا من ذيك الأيام مسوي بحث على "هد الإضاءة" لأني ما كنت متأكد إذا "هد الإضاءة" هذه صفة ولا فعل أمر، وأنت كنت تقول لأصغر عيالك يهدي لك الإضاءة ويجيب لك مخدة عشان تستمع بـ "القيلولة"، بس اللحين بعد موضوع "الدنفسة" و"الدنافيس"، أنا قررت إني أحبك زي ما أنت وما أحاول افهم!