طراطيع مهند ولميس

مساكم الله بالخير يالربع ... إن شاء الله طيبين وشلون العيال وأم العيال .. أحم أحم .. قصدي والوالدين وش أخبارهم ...

يا رب لك الحمد نعمة كريم نعمة الإسلام والمسلمين ...

بصراحة يوم كنت طفشان زباين التشليح قلال .. وذاك اليوم كان إجازة بمناسبة اليوم الوطني الناس متفضية والأسواق عمرانة وأنا مع الزول عصمان والهندي حكيم الزمان كلن يطالع بخشة الثاني ... وبراد شاهي رايح وبراد شاهي جاي ...
وعلى هالحالة لنا أكثر من شهر ..
جتني بصراحة فكرة ذكية ،، وتعرفوني أنا أبو" الفكاكير" ،، تدرون أن بوش بكبره طلبني مستشار للأمن القومي محل موناليزا القديم وعييت ؟!
خبركم ما أشجع أن العقول العربية تهاجر للخارج ...

طبعا قلت لا زم استغل هالفترة وأشوف لي شغلة أكسب من وراها خصوصا أن العيد قرب وطلباته واجد ...
بدون تفكير طرا علي سيارة "حلاو" نعبي منها كل أشكال الحلاوة والكيلو بعشرين وأنت رايح ... وأن فاصلنا الزبون بخمس طعش وأنت ماشي .. لا محل ولا يحزنون .. والله فكرة !!

اتصلت على صديقي العريف حشان أخبر عند خال ولد عم بنت أخت أبوه محل حلاو ولا يفتحه إلا بالعيد وما يبيع إلا بالجملة ..
أنا: ألو حشان وشلونك يا خوي ...
حشان : ايوه أبو هلال ما أسمعك وش تقول ..
أقول وينك أنت هاللحين ..
حشان : في "أسواق منفوحة بلازا بلس ون" ،، ماسكين عصابة تهريب طراطيع وشروخة .. وش عندك .. وش تبي ..

سكت شوي : طراطيع وشروخة والله فكرة، أي حلاو وأي خرابيط حملة خفيفة وفلوس واضحك على هالبزارين وابسط عند حدا هالمولات وهات يا بيع ،، لا ونشغل حكيم الزمان هالدلخ هو وعصمان عند المولات الثانية والشغلة جربتها قبل خمس سنين وفعلا كانت مربحة وفلوس .. فلووووس ...

حشان : ألو أبوهلال .. أبك أنت علامك وينك الله ياخذ عمر العدو؟!
أنا : هاه أيه أيه ،، معكم والله يا أبو الحش ..
حشان : ما قلت لي وش تبي ..
أنا : لا لا .. سلامتك، حبيت اسلم ..

ومع السلامة أنا وهو ...

ومن فوري ركبت الدقسن وعلى البطحاء على طول .. وأنزل عند ذيك العمارة وأدور صحيب لي من هالسنين كنت كفيله واسمه بحر الظلمات أنور القلب ترياق بعد حيي ... أكيد بالقى خبر الشروخة والصواريخ عنده ..

سألت عنه ولقيت عنده محل ملابس بالبطحاء يديره بنفسه ومشغل "بنخيه" الأفغان عنده .. سبحان الله جاء منتف قبل ثلاث سنين وهالحين هالمحل طول بعرض .. الله يرزقه من حصل شيء يستاهله ،، وشبابنا يقولون منين نلقى وظايف ،، والسوق عندهم لكن عمك أصمخ ...

المهم دخلت المحل وقلت : السلام عليكم وين ألاقي بحر الظلمات ..
بحر الظلمات : مين أبو خلال خلا والله .. كيف خالك يا سيخ ..
أنا : مين بحر الظلمات يا الله أن تحييه وشلونك وش أخبارك ..
بحر الظلمات : خلا والله تفزل تفزل ...
أنا : شكرا شكرا ،، المهم فزعتك يا بحر الظلام ..
بحر الظلمات : سم .. سم الله عدوك ..
أنا : أنا أبي شروخه وطراطيع من ربعك هنيا وأبي كمية كبيرة بس لازم سعر رخيص مرة واجد ..
بحر الظلمات : سروخه وتراتيع .. سروخه وتراتيع ؟!
أبسررر لحزة سويه ..
يا بر الكريم : اتهي متاعاشي هع لش يتة هرعن يئسي عتهلالة هنابلخهي مهند ولميس ابو خلال يا سيخ ... سررررعة ..

استغربت : كني ما فهمت من كلامه إلا مهند ولميس؟!!
وش السالفة يا بحر الظلام وش دخل مهند ولميس بالطراطيع ؟!

بحر الظلمات : هازي الموزة يا سيخ .. كلو نفر شيل مهند ولميس .. عطر مهند ولميس .. بيالة مهند لميس .. بقالة مهند لميس .. كريك مهند لميس .. كلو كلو دنيا اليوم كزا مهند لميس ..

استغربت مرة ثانية : الموزة ؟!!
وش الموزة ذي .. أيه أيه الموضة ... يا أخي مهند وتميس ورانا ورانا ..

فكرت شوي : والله فكرة ليه ما أقلب اسم التشليح من تشليح الصفوة إلى تشليح مهند ولميس .. والشاص نسميه مهند والكابرس نسميها لميس .. وشف ربعنا بكرة زي النمل على التشليح ..
والله فكرة بس مو هاللحين بعد العيد إن شاء الله ..

المهم مالكم بالطويلة .. حملت حوض الدقسن وعلى أقرب مول أنا وربعي حكيم زمانه وعصمان الزول وننافس هـ "التكرونيات" نبيع في ذي الطراطيع ..
ونصيح :
الحق يا ولد الحقي يا بنت ..
قرب قرب قرب ..
طراطيع مهند
شروخة لميس ..
الحق الحق الحق ..
اشتر صاروخ مهند وخذ شروخة لميس مجانا ..
الحق الحق ..

وما أمداني أبيع نص البضاعة إلا وذيك اليد اللي تمسكني ..
إلا خويي حشان .. هلا والله يا الله خيه (قصدي حيه) ..

خيه ما خيه .. يا الله قدامي قدامي ..
أفا خويك ..
خويي في الاستراحة مو هنا ..
طيب رفيقك ..
أقول قدامي بسرعة لا تكثر الهرج ..

المهم وأبيت ذيك الليلة اللي يحبها قلبك في فندق الماريوت اللي في الناصرية ..
وأدفع ذيك الغرامة اللي يحبها قلبك بعد ..
وكل هذا اللي جانا من ورا مهندس وتكميس قصدي معندس وتغريس ..
أوه عيت لا تطلع ..

ومع السلامة يا لربع وانتبهوا لعيالكم من الصواريخ والشروخة ترا فيهن خطر كبير عليهم ..

عذرا للأطالة ومع السلامة ،،،