الشمس والقمر والزبيبة

ثمة أمر يجب أن نعيه جيدا قبل تقديم قامات كالتي نقدمها لكم هنا في "بالمحكي"، يجب أن يطلع الخليجي على تجارب المبدعين العرب في هذا المجال، فالشعر ليس حكرا علينا، وصابر فرج خير من يدعم هذا الأمر ويقوي موقفنا أمام القارئ الباحث عن الجمال، فخطوات قصيدته تدخل إلى أرواحنا بطريقة لذيذة ومحببة رغم عمقها.

قمر الليالي الفقيرة شحيح
وقمر الناس الغناي مش صريح
وقمري أما زارني لقيته جريح
فا شُفت الليالي اللي جايه كئيبة
وشمس النهار لفلفت في الشعور
وطلعت عجوزه.. وذات بطن بور
وكانت زمان لما تطلع علينا
تعدي الفيافي لحد البحور
وحتي النجوم اللي كانت معانا
وشافت هوانا
سبتنا وهاجرت بلادها البعيدة
يا قمر الليالي
يا شمس النهار
كئيب الظلام اللي عايش في دار
بيسرق في راحة ولادنا الغلابا
تتوه الخطاوي في وسع المدار
طرحنا العوامل في دايرة نقاش
وطال الجدل بين شيوخ القبيلة
ولسه ميعادك يا فجري ما جاش
وشمسك عاصية عليا
وبخيلة
عطيت فوق ما بقدر
وعدت سنيني بسرعة رهيبة
ولما بفكر
وأواجه في قورتي خشونة الزبيبة
بتهدى جروحي
وبدخل في دور دروشه بيساومني
وبثبت مكاني
والعن شيطان الظلام اللي خدني
بعيد عن ضيائي اللي ياما لازمني
واخدَّر في روحي
ويسري الخدر واستلذ الحكاية
وارجع اشوف كل شئ م البداية
لقيت لسه برضو القمر هوهو
قمر الليالي الفقيرة شحيح
وقمر الناس الغناي مش صريح
وقمري أما شفتو لقيت جريح
فشفت الليالي اللي جاية كئيبة!