مبارك البنيان شاعرٌ يبدو الهدوء في رسمه وقسماته، هدوء مريح جداً ينبعث من ثنايا النص، ليس أكثر دلالةً عليه من مطلع النص الذي يقرّ بوقوع الظلم ثم يعاتب بعد الإقرار بهدوء وعاطفة نادرة، مبارك البنيان في زيارته الأولى لـ "بالمحكي" يشي بزيارات قادمة أجمل وأرحب ونحن بدورنا نفتح له ولأمثاله من المبدعين الشباب بوابة سماء بالمحكي ليملأوها نجوماً وأقماراً عدة.
حكمت بحكمك الظالم وأنا مظلوم
ياليت شوي تمهلني معك ياليت
خذيت اللي تبي مني وأنا محروم
تقصّدني وتفرح فيني لازليّت
وش اللي جاك من عندي عشان تقوم
تشن الحرب ضدّ إنسان.. وش سويت؟
معك دايم أنا وافي إلين اليوم
ومهما قلت في شخصك.. فلا وفّيت
وأما أنك علي تخطي فلا.. "محشوم"
ما اشوفك كنت تقصدها ولا ظنيت!
عشانك تحكم بحكمك وهو مفهوم
وفي لحظات تتراجع تقول أخطيت
أعديها.. أمشيها.. "بلاش اللوم"
كثيرة حيلٍ زلاتٍ أنا عدّيت
ولو إني بحاسبك بخطاك اليوم
حشا والله ما أعديها إلى زليت!
