في يوم من الأيام الجميلة في قرية "ربيشة"، فليحان راكب الددسن ويتمشى في أنحاء ربيشة ومعه صديقه الصدوق " محيميد "

محيميد معه الجريدة ويتصفح وفليحان يلعب بالسبحة ويسوق

محيميد :

• آآآخ ياشيخ ..أبو الوناسة

• وناسة وش ؟

• وزارة التعليم العالي معلنين عن بعثات

• صدز ؟

• شف هنا مكتوب

• إيه والله .. وش الشروط ؟

• انك تكون سعودي ودافور

• الحمدلله أنا سعودي بس مدري عن الدفرة

• ليه ناوي تقدم ههههههه ؟؟

• إيه وليش لا .. من يوم تخرجت وأنا ركض ورا الوظايف ولا حولك احد

• يابوي وين تسافر برا .. مهبول انت ؟

• وش مهبول ؟ وش فيها ؟

• أقول انت ما عمرك ركبت طيارة و ما عمرك شفت إلا ربيشة والرياض .. حتى جدة ما عمرك سافرت لها عشان تسافر امريكا والا أستراليا والا الصين بعد

• وشي امريكا والا أستراليا ؟.. مب ذاك الفرق عن ربيشة

• أبد ما تفرق هههههه

• اذكر الله الي يسمعك يقول اني خلاص جاتني البعثة ومسافر اليوم وبعدين انت ما تفكر تقدم ؟

• تتشمت انت ووجهك ؟

• لا وربي ليه أتشمت

• انت ناسي ان الي معاي شهادة المتوسطة

• إيه صح نسيت .. طيب ما يجي ؟ هاهاي

• أقول لا يكثر

في المساء رجع فليحان بيتهم وهو يفكر ويقلب موضوع البعثة في راسه

وقال : أقدم عليها ومانيب خسران شي

و بما أن في بيت فليحان ما فيه انترنت ولا حتى كمبيوتر

نقز فليحان لأقرب مقهى انترنت وقعد على أحد الكمبيوترات

ومرت ساعة وفليحان يطالع عالجهاز ولا يدري وشلون يشغله ومستحي يسأل أحد

ويوم شاف انه زودها قام نادى الهندي وقال له

• سديق تعال الجهاز مب راضي يشتغل

جا الهندي وشغل الجهاز وراح وفليحان يطالع .. طيب الحين وش أسوي قام نادى مرة ثانية

• يا سديق وين الترترنت

وجا الهندي مرة ثانية وفتح له الإكسبلورر وراح فليحان يحك راسه .. ويتصل على محيميد

• ألوو .. هلا محيميد شخبارك

• شعندك بسرعة ؟

• طيب لا تدف .. أنا في مقهى ترترنت وحايس مانيب عارف أستخدم الكمبوتر والترترنت

• اسمه انترنت يا لوح !

• المهم بالله تعال ساعدني أبي أسجل بالبعثات

• الحين مانت عارف تفتح الترترنت وتبي تروح بعثة انت ووجهك

• تبي تجي والا لا؟؟؟

• وتنافخ بعد !

• أقوول فاردز

• هههههه يلا جايك وأمري لله

وصل محيميد للمقهى وفتح موقع وزارة التعليم العالي ودخل على أبلكيشن البعثة وبدؤوا يعبون البيانات لين وصلوا لرقم الجواز .. ومحيميد يطالع فليحان

• يلا عطني رقم جوازك

• شلون ؟

• لا تقولي جوازك في البيت

• لا لا ماهوب في البيت

• أجل وينه يلا عطني رقمه

• احم

• وش فيك

• لا ولا شي .. بس ما عندي جواز

• لحووول .. صدقت يوم أقولك وجهك مب وجه بعثات

• وش يدريني انهم بيطلبون رقم الجواز

• أجل تبي تسافر بدون جواز يا ذكي ؟

• لا أقصد يعني مدري .. كيف الحال بس ؟

• اسأل عمرك أنا ماشي

• هههههه طيب لا تعصب ان شاءالله بطلع لي جواز

ورجع فليحان لبيته وهو ناوي يمسك خط للرياااض في الصباح عشان يطلع له جوازه الأول

في الصباح .. قام فليحان مرتاع من صوت صراخ أبوه

• فليحاااااااااان

• بسم الله وش فيك يووبا؟؟

• قم قامت عظامك ذبحك النوم

• يوبا حرام عليك توها الساعة ست

• المهم قم يلا أبيك بشغله

• وش شغلته ؟

• نبي نحلب البقر اليوم

• يووه يا يووبا تكفى فكني من هالبقر

• وشوووو ؟؟

• اليوم ضرووري أسافر للرياض

• الرياض ؟؟ وش عندك ان شاءالله يالصايع ؟

• الحين الي يروح الرياض صار صايع ؟

وفليحان يقوول في قلبه هذا شلون لو قلت له أبي أدرس برا

• ما قلت لي وش عندك بالرياض ؟

• يوبا خلني أروح الحين واذا رجعت بعلمك عن كل شي

• أقول تكلم وش مخبي ؟

• لا والله ولا شي بعدين أفهمك الحين لازم أمشي وراي خط

• والبقر من بيحلبهن ؟

• أخوي صويلح

• لا لا انت اذا رجعت بتحلبهن كلهن سامع ؟

• خلاص ابشر بحلب البقر والجمل لو تبي بعد

• الجمل ما ينحلب يا ثور

• طيب آسف

وبسرعة قام فليحان وتجهز وركب الددسن واتصل على محيميد :

• يالله صباح خير

• هلا محيميد أدري اني بثر ومصحيك من النوم

• زين تدري

• بس وش رايك تخاويني للرياض .. المشوار طويل وزهق لحالي

• لا أبي أنام

• نام بالطريق

• وش فايدتي إذا كنت نايم ؟

• عادي على الأقل فيه أحد معاي بالسيارة لو صار حادث نموت سوا

• أقول رح مت لحالك

• ههههههه أمزح معك بسم الله عليك .. المهم يلا تكفى

• انت للحين عندك أمل بتطلع بعثة ؟ هههههه

• لا بس بطلع جواز زينة ارتحت ؟

• طيب طيب يلا أنتظرك

بعد ربع ساعة وصل فليحان بيت محيميد وقعد ينتظره في السيارة ويفكر في البعثة ويتخيل نفسه برا

شلون راح يلبس ؟ وهو ما عمره لبس غير ثياب

والا كيف راح يتفاهم بالانجليزي وهو للحين يسميها عنقليزي

والا وش راح يسوي إذا كلمته وحدة شقرا وعيونها زرق

ويقطع تفكيره صوت صكة باب الددسن (طرررااخ )

محيميد :

• سرحان في وش يابو الشباب؟

• في خشتك الجميلة

• الله يسلمك يارب .. يلا بس مشينا

وبعد ساعات وصلوا الرياض وعلى طول على إدارة الجوازات

ودخل فليحان متحمس .. ومعه محيميد يسحب رجلينه سحب

وتوجه فليحان لأحد الموظفين

وقاله :

• لاهنت يابو الشباب .. أبي واحد جواز !!