حنا يا جيل الشعرا البين وبين (الشعرا بدون همزة للباش مهندزين اللغويين) جيل أكثر ما يليق بنا من أوصاف "معايد القريتين"، لا حنا اللي حصلنا علمٍ غانم وجماهيرية مثل بعض هالشعرا اللي سبقونا، ولا حنا اللي بقينا لين "شاعر المليون" وشاركنا وعيّنا خير مع اللي شاركوا، أقلها الواحد تطلع خشته باليوتيوب! واليوتيوب لخويا المرحلة اللي ما يعرفون اليوتيوب، هو موقع إلكتروني شهير جدا، يقدر أي واحد يصور نفسه ويشوف نفسه فيه زي التلفزيون بالضبط، اللهم ان الشاشة صغيرة شوي، واللي إنترنته من أبو سلك تلفون لا يتعب نفسه!
ولا حصل يهدى الله بعض هالبرامج تاخذنا نحكم للمتسابقين ونسترزق من خلال خبرتنا بالشعر، نعرف الوزن والقافية ما يبيلها شي! أنا متابع الزملا اللي بلجان التحكيم (الزملا بدون همزة للباش مهندزين اللغويين) كل الزملا ما يدققون على شي إلا الوزن، هذا عنده كسر وقفه واحبس دمه شوي وسو نفسك فيلسوف زمانك، عيد عيد.. وقف هنا.. ياخي كان قلت يا بارقن بدل يا بارق وينجبر البيت.. طيب شيلها يا شايلينك بشيول.. طاق طاق طاقية هذا مو شعر! ويا ويل اللي يعاندني ويقول بيتي مجبور، أنهي أحلامه بـ "الراحة"، وإذا جا واحد من المهبل اللي يضربون، المونتاج ما يقصر!
يعني يا جماعة الخير المسألة سهلة، لا تتخيلونها صعبة على "الخبرات الشعرية" اللي مثلنا، وزن وقافية وانتهى الموضوع، وفرضا واحد طموحه يصير عضو لجنة تحكيم وما يعرف للوزن برضو أقول لكم سهلة، اللحين حنا في عصر التكنولوجيا، الواحد منا بكل سهولة يروح يشتري برنامج كمبيوتر مسويه خوي المرحلة "سعد الشعلاني"، وهذا برنامج ما يقصر، دخل أي جملة براسك واختر البحر اللي تبي ويلفق لك قصيدة، بس هو الله يهديه ما استعان بخبرات الزميل "حمد السعيد" في البحر الهلالي، إذا دخلت الجملة واخترت البحر الهلالي تهنق الشاشة! بس أنا واثق بقدرات الزميل سعد، لأنه راح يطور من نسخة برنامجه ولا عاد يهنق بالهلالي!
المهم يا جماعة الخير الشاهد من الموضوع كله، إن زملا المرحلة اللي ما عندهم شغل واجدين، يعرفون الوزن والقافية وعاطلين عن العمل، المفترض إننا نساعدهم بإيجاد برامج مماثلة عشان يوفقهم الله وتمشي أحوالهم مثل ما مشت أحوال غيرهم، وما نصير معايدين القريتين!
